მედიის ადვოკატირების კოალიცია გმობს „პალიტრა მედიის“ წინააღმდეგ ხელისუფლების მადისკრედიტირებელ კამპანიას
მედიის ადვოკატირების კოალიცია გმობს „პალიტრა მედიის“ წინააღმდეგ ხელისუფლების მადისკრედიტირებელ კამპანიას
მედიის ადვოკატირების კოალიცია შეშფოთებას გამოხატავს მმართველი პარტიის, „ქართული ოცნების” მხრიდან „პალიტრა მედიის“ წინააღმდეგ მიმართული კამპანიის გამო, რომლის მიზანსაც მედიაზე ზეწოლა, საზოგადოების თვალში მისი დისკრედიტაცია და თვითცენზურის გარემოს დამკვიდრება წარმოადგენს.
ბოლო დღეების განმავლობაში მმართველი პარტიის წარმომადენლები [1] და პრო-სამთავრობო მედია [2] აქტიურად ეწევიან „პალიტრა მედიის“ წინააღმდეგ მიზანმიმართულ დისკრედიტაციის კამპანიას. „ქართული ოცნების” თავმჯდომარის, ირაკლი კობახიძის განცხადებამდე „პალიტრა მედიას” წინააღმდეგ უსაფუძვლო განცხადებები ერთ-ერთ საინფორმაციო გვერდზე გავრცელდა [3], რასაც მმართველი პარტიის ხელმძღვანელი პირების განცხადებები მოყვა. აღნიშნული გარემოება მიანიშნებს, რომ ეს კამპანია მიზანმიმართული და ორგანიზებულია, ხოლო მის სამიზნეს „პალიტრა მედია“ წარმოადგენს. აღნიშნული კამპანიის ფარგლებშიც მმართველი პარტია აგრძელებს თავდასხმებს ტელეკომპანია „ფორმულაზე“.
„პალიტრა მედია“ გამოეხმაურა მის მიმართ წარმოებულ კამპანიას და მათ შორის განაცხადა, რომ მედია ყოველთვის დამოუკიდებელი იყო პოლიტიკური გავლენებისაგან და მისი დაფინანსება გამჭვირვალეა.[4]
ქვეყანაში არსებული უკიდურესად მძიმე მედიაგარემოს ფონზე,[5] როდესაც კრიტიკული მედიის წარმომადგენლებზე რეგულარულად ხორციელდება ფიზიკური თავდასხმები, პოლიტიკურად მოტივირებული სასამართლო საქმეები, მუქარა, უკანონო მოსმენები, ხელისუფლების ბოიკოტი თუ დეზინფორმაციული კამპანია, მმართველი პარტია ნაცვლად მედიაგარემოს გაუმჯობესებისა და ჟურნალისტების უფლებების დაცვისა, აგრძელებს და აფართოებს თავის აგრესიულ და მადისკდრეტირებელ რიტორიკას და სამიზნედ ახალ მედიას ირჩევს. აღნიშნული პროცესი კიდევ უფრო გააღრმავებს ქვეყანაში არსებულ პოლარიზებულ გარემოს.
„პალიტრა მედია“ უკვე ათეული წლებია საქმიანობს ქართულ მედია სივრცეში და მნიშვნელოვან როლს ასრულებს საზოგადოების ინფორმირებასა და პლურალისტური გარემოს უზრუნველყოფაში.
მედიის ადვოკატირების კოალიცია მოუწოდებს საქართველოს ხელისუფლებას, შეწყვიტოს „პალიტრა მედიისა“ თუ ნებისმიერი სხვა მედიის წინააღმდეგ მიზანმიმართული მადისკრეტირებელი კამპანია, შეასრულოს ქვეყნის კონსტიტუციით ნაკისრი ვალდებულებები, უზრუნველყოს მედიის უფლებების დაცვა და ჟურნალისტებისთვის ჯანსაღი სამუშაო გარემოს შექმნა.
[1] პალიტრა მედია გახდა კეზერაშვილის მეორე ტელევიზია, www.batumelebi.netgazeti.ge, 28.03.2023, https://rb.gy/odaz
[2] მამუკა მდინარაძე: შეიძლება ყველას ვერ დავაბრალო, მაგრამ „პალიტრა მედიის“ ზოგიერთი წარმომადგენელი მკვეთრად იყო გადახრილი იმ ტრენდისა და ნარატივისკენ, რასაც ნაცმოძრაობა მესიჯების სახით ახმოვანებდა ხოლმე, ტელეკომპანია იმედი, 28.03.2023, https://rb.gy/ce8z
[3] კეზერაშვილი „პალიტრა მედიას“ აფინანსებს, www.ongo.ge, 27.03.2023, https://rb.gy/jxev
[4] „პალიტრა მედიის“ განცხადება, www.ipn.ge, 28.03.2023, https://rb.gy/6xm6
[5] ამერიკის შეერთებული შტატების სახელმწიფო დეპარტამენტის 2022 წლის ანგარიში საქართველოში ადამიანის უფლებათა შესახებ, https://rb.gy/3roj